Ақтөбе облысында «QazaqGaz Aimaq» АҚ қызметкерлері Төтенше жағдайлар департаментінің мамандарымен және Ақтөбе қаласының Тұрғын үй инспекциясының өкілдерімен бірлесіп, тұрмыста табиғи газды пайдалану кезінде жазатайым оқиғалардың алдын алу мақсатында тұрғындар арасында түсіндіру жұмысын жүргізді.

Алдын алу шаралары Ақтөбе қаласындағы жеке сектор мен көпқабатты тұрғын үйлерді, сондай-ақ облыстың елдімекендерін қамтыды. Барлығы 1 045 үй қамтылды.

Кездесулер барысында мамандар азаматтарға газ жабдықтарын қауіпсіз пайдалану талаптарын, түтін мұржалары мен желдету арналарын тексеру тәртібін, сондай-ақ газ плиталары мен жылыту қазандықтарын пайдалану қағидаларын түсіндірді.

Ішкі газ жабдықтарына уақтылы техникалық қызмет көрсетудің маңыздылығына ерекше назар аударылды. Тұрғындарға газ құралдарын өз бетінше қосуға, орнын ауыстыруға немесе жөндеуге қатаң тыйым салынатыны және мұндай жұмыстарды тек мамандандырылған ұйымдар ғана орындауға тиіс екені ескертілді. Сонымен қатар, газдануды бақылау құралдарын орнату және оларды уақтылы тексерудің маңыздылығы атап өтілді.

2026 жылдың қаңтар–ақпан айларында тұрмыста газды пайдалану бойынша 1 оқиға тіркелді.

Үйлерді аралау барысында азаматтарға газ иісі анықталған жағдайда әрекет ету алгоритмі түсіндірілді: газ құралдарын пайдалануды дереу тоқтату, газ беруді жабу, бөлмені желдету және 104 нөмірі бойынша апаттық қызметке хабарласу қажет.

«QazaqGaz Aimaq» АҚ өкілдерінің айтуынша, мұндай алдын алу шаралары тұрақты негізде өткізіледі — 2025 жылы олар төрт рет ұйымдастырылды — және халық арасында газды қауіпсіз тұтыну мәдениетін арттыруға бағытталған.

Сондай-ақ Тұрғын үй инспекциясының, Ақтөбе облысы бойынша ТЖД және түтін мен желдету арналарының жай-күйін тексеретін ұйымдардың қатысуымен дөңгелек үстел отырысы өткізілді.

«Тұтынушылардың қауіпсіздігі — біздің анық басымдығымыз. Үйлерді аралау жұмысы газды пайдалану қағидаларын еске салумен қатар, тұрғындардың сұрақтарына тікелей жауап беруге, ықтимал тәуекелдерді анықтауға және оларды дер кезінде жоюға мүмкіндік береді», — деп атап өтті «QazaqGaz Aimaq» АҚ Ақтөбе өндірістік филиалы апаттық-диспетчерлік қызметінің басшысы Ернар Мұқанов.

Түсіндіру жұмыстарымен қатар, тұрғындарға табиғи газды қауіпсіз пайдалану қағидалары және шұғыл қызметтердің байланыс нөмірлері көрсетілген жадынамалар таратылды: 2025 жылы — 28 600 дана, 2026 жылы — 1 045 дана.

Бірлескен сақтық акцияларын өткізу оқыс оқиғалар санын азайтуға, қызметтер арасындағы өзара іс-қимылды нығайтуға және газ жабдықтарын пайдалануға жауапкершілікпен қарауды қалыптастыруға ықпал етеді. Кешенді жұмыс өңірде сенімді әрі қауіпсіз газбен жабдықтауды қамтамасыз ету жөніндегі жүйелі саясаттың маңызды бөлігі саналады.

АНЫҚТАМА

Қазіргі уақытта Ақтөбе өндірістік филиалының құзырында жоғары, орта және төмен қысымды жалпы ұзындығы 5 862 469 метрден астам газ құбырлары бар, оның ішінде 850 метрі магистральдық желілерді құрайды.

Пайдаланудағы тарату желілерінің ұзындығы 5 861 619 метрді құрайды. Сонымен қатар, филиалдың қызмет көрсетуінде жалпы ұзындығы 3 150 188 метр болатын бюджеттік газ құбырлары бар.

Филиалда:

• 1 АГТС — автоматтандырылған газ тарату станциясы;
• 214 ГРП — газ реттеу пункті;
• 3 220 ГРПШ — шкафтық үлгідегі газ реттеу пункті бар.

Барлығы 276 496 абонент газдандырылған, оның ішінде 129 159 жеке тұрғын үй және 140 565 пәтер. Сондай-ақ 847 өнеркәсіптік кәсіпорын мен 5 925 коммуналдық-тұрмыстық ұйым газбен қамтамасыз етілген.

Филиал қызметкерлерінің штаттық саны — 587 адам.